上屆亞軍主場威力強
新一屆歐聯32強分組賽周三凌晨正式開打，C組首輪爆發超強戲碼，上屆亞軍利物浦主場硬撼富豪球會巴黎聖日耳門(PSG)。紅軍上屆表現已盡顯爭標實力，今季增強補短後戰力更上一層樓，加上佢哋上屆歐聯7場主場未輸過，面對防線不穩嘅PSG，讓平半上盤捧得過。
（Now 643、有線662及602台周三凌晨3時直播）
利物浦自從由高普接手後，高強度逼搶踢法，令唔少歐洲勁旅聞風喪膽，上屆紅軍喺歐聯成功殺入決賽，可惜因為門將卡利奧斯連番犯錯而飲恨，今屆紅軍決心捲土重來，高價簽入巴西門將艾利臣比加填補漏洞，前線則繼續以「進攻鐵三角」穆罕默德沙拿、羅拔圖法明奴及沙迪奧文尼為重心，配合防中拿比基達來投，無論攻守實力皆得到提升，球隊喺今季英超開季5連勝，信心、狀態都冇得挑剔。利物浦上屆由附加賽開始，主場7次出戰歐聯攞得5勝2和，主場出擊絕對係信心保證。
PSG作客遇強即屈
PSG坐擁尼馬、卡雲尼、基利安麥巴比及迪馬利亞等頂尖攻擊好手，不過佢哋出戰歐聯成績卻未如理想，上屆作客就曾經輸過畀拜仁及皇馬，客場遇強即屈。新上任嘅杜曹無論喺經驗或感染力都唔及高普，接手後仍不斷試陣，球員需時適應。PSG喺法甲雖然同樣錄得開季全勝，但面對甘岡、昂熱及尼姆等中型班都有失波，今場仲有新加盟嘅門神保方坐越季波監，防線更加唔穩陣，利物浦讓平半捧上盤。