英超「4哥」利物浦今晚主場恭候「大黃蜂」屈福特，3分可以話係志在必得，趁住3支前列球隊曼聯、車路士同熱刺今個星期轉戰英足盃8強而輪空，「紅軍」只要贏波就可進佔第3位，而且射手穆罕默德沙拿仲要爭金靴獎，對住作客發夢嘅屈福特大炒在望，讓球盤讓到兩球都撐硬上盤！
（Now 621周日凌晨1時30分直播）
利物浦上輪聯賽輸畀曼聯，依家領先第5位嘅車路士只有4分，前4位置仍然唔穩陣，因此今仗肯定火力全開爭勝啦！「紅軍」王牌前鋒穆罕默德沙拿今季踢到曉飛，目前同熱刺哈利卡尼一樣入24球並列射手榜榜首，不過哈利卡尼受傷至少抖1個月，「埃及王子」仲唔把握機會瘋狂數胡咩？
冇Heart「大黃蜂」作客衰到暈
「大黃蜂」屈福特近3仗主場先後擊敗車路士、愛華頓同西布朗，護級基本上冇大問題，不過佢哋作客成績醜到唔見得人，近8仗聯賽作客1和7負，包括上輪聯賽作客吞阿仙奴3蛋，可見屈福特「上岸」之後已經冇乜戰意，今仗對住火力超恐怖嘅利物浦，似乎難逃慘敗。
分享到：