摩洛哥0分焗攻
今晚世盃頭場爆發B組次輪關鍵戰，由葡萄牙硬撼摩洛哥。葡軍雖然上仗贏唔到，但王牌基斯坦奴朗拿度(C朗)大演帽子戲法，係過去3次參加世盃嘅士哥總和，真係腳風順到冇朋友，摩洛哥上仗臨尾香冇分落袋，為晉級今仗要焗攻搶W，撞正防線不穩嘅葡萄牙，好大機會合演入球騷，2.5球大盤有計。
（ViuTV 99、now 616及618周三晚8時直播）
葡萄牙上仗憑王牌C朗連中三元，最終於3比3逼和勁敵西班牙保住1分，呢位隊長成為世盃決賽周史上最老帽子戲法嘅球員，亦係繼巴西球王比利、德國兩位名宿施拉及高路斯之後，另一位連續4屆世盃有波入嘅球員。C朗1場就入3粒，係佢過去3屆世盃士哥嘅總和，腳風堅順。而呢3球中有12碼、遠射及罰球，板斧甚多，嗰個扳平罰球時速達96.5公里嘅驚人速度，個波由射出到入波只係0.82秒，非常誇張，考慮到C朗年紀已經有3張幾，愈老愈弗實在令人佩服。
葡萄牙防線穿晒窿
另一邊廂，摩洛哥上仗對伊朗一直「窿對窿」，諗住和波收場，點知後備入替嘅前鋒布夏迪斯卻誤擺老烏，最終輸0比1堅唔抵，1分都冇依家排包尾，落後「雙牙」1分及榜首伊朗3分，為出線今仗不容再失，勢必搶攻爭勝，不過谷得太上，隨時畀弗爆C朗有機可乘。話說回來，葡萄牙上仗兩番領先下，竟一度畀「狂牛」反先3比2，最終各三言和算係大話夾好彩，而中路守將比比及荷西方迪轉身太慢，防線穿晒窿，面對焗攻嘅摩洛哥，勢必大手交易，大盤有買趁早。