朗尼壓陣愈踢愈醒神
周五早上美職淘汰圈戰火再燃，其中東岸華盛頓聯隊將會主場迎戰哥倫布機員。華盛頓聯隊自朗尼加盟之後，成隊波即刻生猛好多，尤其近期主場優勢明顯，呢場再喺自己地頭出擊絕對有着數，主勝有2.15倍夠晒和味，唔好錯過。
（Now 638、有線614及654台周五早上8時直播）
今季美職季後賽最具話題性嘅球隊，肯定非華盛頓聯隊莫屬，皆因球隊自高調引入前曼聯同愛華頓前鋒朗尼之後，成隊波好似轉晒性咁，表現大大改善。好多人以為呢位33歲英格蘭球星，決定嚟美職同半退休冇分別，不過出晒名求勝心強嘅佢，就攞出實際表現，向大家證明自己依然仲有貨。常規賽季中加盟之後，隨即以12個入波成為球隊頭號射手，狀態明顯弗到爆。有呢位多年嚟喺英超揾食嘅球星壓陣，華盛頓聯隊近5仗主場就豪取全勝佳績，今場面對典型主強客弱嘅哥倫布機員，乘勢再贏冇難度。
洛杉磯鹽湖城西岸獻細
同日西岸淘汰圈大戰，有FC洛杉磯主場鬥皇家鹽湖城。皇家鹽湖城作客表現飄忽，尤其進攻效率時好時壞，近7仗作客6次開3球或以下。主隊FC洛杉磯雖然今季首次踢美職，不過佢哋有卡路士韋拿等進攻好手在陣，實力絕對唔講得笑，唔敢輕敵嘅皇家鹽湖城，呢場作客應該會踢得更謹慎，以守為主，唔畀主隊有機可乘，中位數3.5球入球細係好路。
（Now 639、有線615及655台周五早上10時30分直播）