祖記搵AC出氣

2018-11-11 10:06 来源:滚球网

歐聯發波瘟C朗一肚火
今晚意甲壓軸尾場,由AC米蘭喺主場火併「1哥」祖雲達斯。雖然AC射手希古恩希望報復舊東家,但祖記啱啱喺歐聯一時大意輸波,谷埋成肚火,王牌基斯坦奴朗拿度(C朗)不嬲最要面,今場實搵「紅黑兵團」發洩,加上近年交鋒食住對手,客勝不容錯過。

(Now 638、有線654及614台周一凌晨3時30分直播)

希古恩唔弗無力復仇
上季仍係祖記主力射手嘅希古恩,因球隊要高價買C朗,就將呢位阿根廷前鋒掟去AC,今場自不然想向舊東家復仇,不過佢查實只係啱啱好番,未必夠弗,中場碧基亞及查漢奴古仲養緊傷,禍不單行係後衞梅沙基奧又整傷十字韌帶,要抖6至8周,咁多傷兵,而且近11場只得1場冇失波,防線極唔穩陣,搞到主帥加度素非常頭痛。

祖記自今季開咧後,一直順風順水,不過在上周中歐聯分組賽主場對曼聯,喺領先1粒之下,竟於末段發波瘟連失2粒反輸1比2,對一向穩陣嘅「老婦人」嚟講非常罕見。而喺呢場先開紀錄嘅C朗,賽後嬲到爆話佢哋有3至4個機會可鎖定勝局,衰在未能把握,反而曼聯好似乜都冇做過就反勝,正正係自己隊波過於鬆懈,最終受到懲罰,睇得出呢位王牌滿腔怒火,梗係唔想連衰兩鋪,今場實搵AC發洩。

近5次對賽祖記贏晒
事實上,連續7季稱霸意甲嘅祖記,喺國內未逢敵手,今季頭11場聯賽豪取10勝1和佳績,等閒球隊好難阻擋佢哋,加上近5次對AC贏晒,明顯格食格,客勝有計。