曼城踩油強襲哈特斯

2019-01-20 10:18 来源:滚球网

哥帥落柯打唔搏冇正選.
今晚英超頭場,「2哥」曼城作客包尾嘅哈特斯菲爾德。雖然曼城近況回勇,但主帥哥迪奧拿一向要求高,落柯打邊個唔搏盡就咪使旨意擔正,面對處於無帥狀態嘅哈特斯,仲唔趁機踩多兩腳咩?就算讓兩球都要捧讓球客勝。
(Now 621周日晚9時30分直播)

曼城自聖誕快車初段意外2連敗後,近期極速反彈,各項賽事豪取5連勝,包括於榜首大戰2比1勇挫利物浦,保住爭冠希望,若果單計近3仗贏晒之餘,更狂轟19粒,場場至少贏3粒堅猛火。要數近期最弗嘅曼城鋒將,梗係加比爾捷西斯,上面嗰24球裏面,捷西斯便佔咗其中7粒。不過日前牛一嘅「壽星佬」哥迪奧拿一向要求高,佢話「耶穌仔」已經進步緊,但仲要再提升,因為曼城只會打單箭頭,而佢係同「藍月亮士哥王」阿古路爭位,若果唔做到最好點爭贏呀?

查實其他位置都競爭激烈,就連傷愈冇耐嘅中場主力奇雲迪布尼,近期亦搶唔番正選位置,因為貝拿度施華、菲爾科頓都幾弗,翼鋒位又有史達寧、利萊辛尼、馬列斯爭崩頭。加上早前有輕敵之嫌搞到2連敗,幾乎斷送爭標機會,哥帥深明要追貼榜首利物浦,真係不容再失,務求眾將要場場交足貨,近期強勢反彈絕非偶然。

「無帥」哈特斯遇強即屈
哈特斯今季表現差勁,近10場僅1和9負,依家淪為包尾大幡,帶隊升班兼上季成功護級嘅功勳主帥華拿,最近亦引咎辭職,暫由助教頂住先,處於無帥狀態,狀態、士氣唔慌好喇。何況哈特斯遇強即屈,今季聯賽6次鬥Big 6球隊全敗之餘,其中5次換邊前已經落後,由頭輸到尾,面對火力全開嘅曼城,隨時崩潰狂輸,曼城讓兩球都冇有怕,直取讓球客勝。