今日阿King揀咗3場直播賽事玩過關，其中意甲尾場拿玻里主場鬥拉素最好路。拿玻里今場有3大主力停賽，殘陣出擊，加上拉素仲要搶分保住前4名，戰意、決心贏晒主隊，拉素讓球客勝捧得過。
（Now 638、有線614及654台周一凌晨3時30分直播）
兩軍上周歇冬後首戰意盃16強齊齊贏波晉級，狀態唔錯，不過拿玻里今場有射手恩斯治尼、中場阿倫盧利奧及中堅高列巴尼3名主力停賽，加上比利時前鋒梅頓斯及中場咸錫亦有傷在身，陣容嚴重不整，對爭勝有一定影響。拉素雖然都有阿當馬路錫坐波監，但相對影響不大，何況未踢今輪比賽前，排第4嘅拉素同第7位嘅森多利亞只係差3分，相反排第2嘅拿玻里領先拉素卻有12分之多，所以拉素要保住下屆歐聯參賽資格真係一分都不能少，今次乘主隊殘陣有力偷雞。
德甲紐倫堡後防穿窿等劏
另外兩關分別揀德甲及法甲賽事，先講紐倫堡主場鬥哈化柏林，紐倫堡對上一次聯賽贏波已經係去年9月，之後11場聯賽只得3和8負，現排包尾護級水深火熱，而且佢哋後防主力羅拔包亞及奇雲高頓都有傷，哈化就算有澳洲國腳馬菲歷基出戰亞洲盃一樣夠殺，作客讓平半捧上盤。（Now 672及FOX+周日晚上10時30分直播）最後法甲尾場聖伊天主場鬥里昂，今場係隆河阿爾卑斯打吡戰，為面子各不相讓；聖伊天歇冬後聯賽連盃賽3連勝，相反里昂近4場只喺法足盃贏過低組別嘅波爾基斯，聖伊天今場有得受讓必捧下盤。
（Now 639、有線615及655台周一凌晨4時直播）