淘汰賽階段讓波蝕章
今晚續有亞洲盃16強激戰，最矚目嘅梗係奪標熱門日本硬撼沙特阿拉伯。「藍武士」雖然分組賽3場贏晒，但入局慢欠缺霸氣，加上喺近屆亞洲盃淘汰賽戰績麻麻，今仗隨時老鼠拉龜冇碇埋手，法定時間未必搞得掂沙特，轉捧讓球客勝。(Now 671周一晚7時直播)
日本喺今屆F組分組賽3戰全勝，但千祈唔好畀個績呃到，首仗對住弱旅土庫曼竟然先落後，幾經辛苦先反勝3比2；次輪對阿曼早段入波後不思進取，最終僅贏1粒；尾輪收起10名主力，以2比1反勝同樣副選應戰嘅烏茲別克，表現毫無霸氣，除咗大迫勇也算OK之外，「藍武士」缺少一名可靠射手壓陣，佢之前右臀有傷，休息咗幾日，尋日先至首次着波砵練習，狀態成疑。
另一邊廂，沙特阿拉伯喺E組分組賽頭2場贏晒後，尾場爆冷輸畀卡塔爾，相信今仗會打醒十二分精神，加上射手艾達華沙利坐完波監復出，不容小覷。翻查紀錄，日本於近7場亞洲盃淘汰賽，法定時間只得1勝5和1負，其中3場要踢加時甚至互射12碼才贏波晉級，表現咁「立」，預計沙特可以喺法定時間頂住唔輸，受讓必捧讓球客勝。
烏茲別克唔赦澳洲
至於夜少少有上屆盟主澳洲火併烏茲別克，「袋鼠國」今屆表現麻麻，喺B組首仗分組賽落筆打三更輸畀約旦，之後連贏2場，亦只得次名出線。雖然守將沙尼貝利刑滿復出，但自從射手卡希爾退出國家隊後，佢哋進攻冇乜太多板斧。相反，烏茲別克自名帥古柏接手後，尤其係快速反擊非常煞食，喺F組分組賽頭2場贏晒，尾場收起部分主力，僅以1比2不敵日本，雖敗不辱，今仗絕對唔赦澳洲，有得受讓梗係捧讓球客勝。