射手復出搵到食
周五下午澳職獨腳戲，阿德萊德聯將會主場硬撼聯賽「1哥」珀斯光輝。阿聯主場表現有保證，今仗仲有主力前鋒米利奧斯歷傷愈復出，重拾進攻火力，藉地利有力同珀斯光輝周旋到底，阿德萊德聯下盤係好路。
（Now 639、有線615及655台周五下午4時50分直播）
阿聯暫時於積分榜排名第5，佔據季後賽席位，不過只係領先排名第7嘅紐卡素噴射機得5分，加上受傷兵問題影響，近4輪聯賽未贏過波，搞到主帥馬高告斯都出現要執包袱走人嘅危機，好彩前鋒米利奧斯歷呢場及時復出，相信有力改善鋒線乏力嘅問題。加上阿聯主場成績不嬲有交代，近6仗主場取3勝2和1負，呢場有望再靠地頭優勢搶分。
況且阿聯陣前有好消息，就係球會主席雲迪普爾尋日外遊完畢，一返到阿德萊德就開記招，話會同主帥馬高告斯坐低傾下未來大計，言下之意即係派定心丸，表明「告Sir」嘅帥位依然穩陣。同時，佢又宣布同馬朗尼續約多一年，呢位32歲右閘屬老大哥，係15-16年球季嘅奪冠功臣之一，相信此舉亦可穩定軍心。
光輝連續2仗失分
珀斯光輝聯賽不敗已經去到12場，不過近期狀態有所放緩，尤其後防表現欠穩，多次畀對手偷雞得手，繼早前作客畀西悉尼流浪者逼和之後，上仗作客墨爾本城，都要去到臨完場前，先靠迪亞高卡斯度嘅入波搶番1分，呢場面對靠主場搵食嘅阿聯隨時再有閃失，光輝作客讓平半，捧番阿德萊德聯下盤好過。