今晚歐洲國家盃外圍賽C組首輪開打，荷蘭喺主場迎戰白俄羅斯。「橙衣兵團」已從谷底反彈，以華基爾雲迪積克、法蘭基迪莊及迪比為骨幹，早前於歐國聯更砌低世盃盟主法國，唔講得笑，加上近年主場出擊例炒白俄，荷蘭就算讓兩球照捧2.15倍讓球主勝。
（有線603及604台周五凌晨3時45分直播）
自2014年世盃獲得季軍後，荷蘭隨住尹佩斯、洛賓、史奈達等老化而跌落谷底，接連錯過2016年歐國盃及上年世盃決賽周，認真羞家。幸好名宿朗奴高文上年接手銳意年輕化，阿積士孖寶馬菲斯迪歷特及法蘭基迪莊趁機上位，前者取得上年歐洲金童獎，迪莊亦早被巴塞簽入下季加盟，利物浦中堅華基爾雲迪積克經過幾年歷練後已可擔大旗，連同喺里昂表現復甦嘅迪比，前中後三線都齊腳，走出前幾年青黃不接嘅困局。
近3對賽至少贏3粒
上年歐國聯可謂朗奴高文嘅試金石，面對兩大勁旅德國及法國，「橙衣兵團」毫無懼色，4戰錄2勝1和僅1敗取得首名出線，其中喺主場以2比0勇挫上年世盃冠軍法國，全場緊迫打法壓到「高盧雞」有氣冇碇抖，令人喜出望外。白俄只屬歐洲三流球隊，今次繼續召入老將希比擔大旗，可見人才凋零。「橙衣兵團」近3次主場對白俄贏晒，而且全部至少贏3粒，今仗要讓兩球都冇有怕，直取讓球主勝。