歐洲國家盃外圍賽B組首輪，葡萄牙主場迎戰烏克蘭。上屆盟主葡萄牙有王牌射手基斯坦奴朗拿度（C朗）強勢回歸，風頭火勢烏克蘭梗係唔敢亂攻，主帥舒夫真高有「防守專家」泰索迪傍住，造訪葡軍頂得兩嘴，捧入球細。（有線603及604台周六凌晨3時45分直播）
祖記為保佢放棄赴美
葡萄牙王牌C朗喺早前歐國聯獲准掛免戰牌，賽前有關佢效力嘅祖記消息，美國傳媒報道，落實參加「國冠盃」嘅祖雲達斯，將放棄美國站賽事，原因係球會擔心因涉嫌強姦而被拉斯維加斯警方調查嘅C朗，入境美國會被捕，祖記今屆只會出席亞洲站賽事。
講番場波，上屆盟主嘅葡軍重召C朗歸隊，不過主帥費蘭度山度士一向主打反擊戰術，C朗對住死守球隊一定成為眾矢之的，而且缺少空間打突擊，進攻勢必大打折扣。
眼見C朗強勢回歸，烏克蘭都唔敢大意，主帥舒夫真高雖然係一代射手，但自從執教後堅重視防守，呢3年來有助教泰索迪幫拖，呢位昔日喺AC米蘭與巴里斯、哥斯達古達及馬甸尼組成鋼鐵防線嘅右閘，以防守老辣見稱，喺佢調教下令烏軍後防穩健度大有改善。唔單止喺早前歐國聯B1組排第1獲升班，近5場只失5球，有4場開2球或以下，今場作客一定穩陣至上。