英軍精益求精搶首捷

2019-03-22 10:18 来源:滚球网

港人至愛今晚擺擂台
今晚續有多場歐國盃外圍賽上演,港人至愛英格蘭喺A組亮相主場鬥捷克,仲要有免費電視直播,大家點可以錯過!英軍喺上年世盃及歐國聯表現出色,今次沿用主力出戰依然係信心保證,更何況英軍喺溫布萊主場出擊向來打高一皮波,近6場主場贏5場,有力擊敗青黃不接嘅捷克打響頭炮,英軍讓一球、球半波童捧上盤。

(香港開電視77台、有線602及662台周六凌晨3時45分直播)

修夫基增兵班底更強
英格蘭賽前爆出退隊潮,史東斯、戴爾夫、勞基梳爾、羅夫度斯卓克及阿歷山大阿諾特因傷避戰,不過主要骨幹包括哈利卡尼、史達寧、迪利阿里及哈利馬古尼等俱可候命,預計影響不大。「三獅兵團」喺上年世盃殺入4強及歐國聯力壓西班牙、克羅地亞出線,成績有目共睹,而且陣中大部分主力都係當打之年,預期英軍喺未來幾年嘅國際大賽依然大有作為,不過領隊修夫基冇原地踏步,繼去年徵召效力多蒙特嘅新貴翼鋒查頓辛祖,今次亦首度挑選車路士小將赫臣奧杜爾,又搶贏愛爾蘭獲韋斯咸防中迪格蘭賴斯「變節」,加上仲有近期幫修咸頓射入唔少靚罰球嘅「死球專家」禾特普斯,呢班新血相信可為英軍帶嚟良性競爭,為博表現唔會放軟手腳。

捷克青黃不接冇得揮
捷克雖然係歐國盃常客,對上6屆都能打入決賽周,但近3屆有2次分組賽出局,而且世盃已經連續3屆無緣決賽周,明顯處於青黃不接期,傳奇門神施治已告別國家隊,現時陣中稍具名氣僅有羅馬前鋒柏德列舒希克、般尼前鋒馬迪維達及森多利亞中場積及贊圖,論個人質素及國際賽經驗,難與如日方中嘅英軍相比。英格蘭對上6場主場除咗喺歐國聯以1比2輸畀勁旅西班牙,其餘5場全部贏晒,今場英軍讓一球、球半唔怕多,上盤捧得過。