周日凌晨歐國外F組焦點戰，西班牙將會主場鬥挪威。「狂牛」大軍名單出現多位新面孔，領隊安歷基明顯志在考察新人，一班球員為搏上位肯定踢得更盡力，況且西班牙近期都經常演入球騷，中位數2.5球入球大唔好錯過。
（有線602及662台周日凌晨3時45分直播）
僅召7位世盃成員
「狂牛軍團」今次國際賽期，將先後於歐國外鬥挪威同馬耳他，兩個對手實力同西班牙有明顯差距，贏波難度唔算大，有見及此，主帥安歷基今期國家隊召入嘅23人大軍中，只有7位前世盃成員，名單其餘大部分都係新人或邊緣人物，除了有相隔7年再次回歸國家隊嘅畢爾包中場蒙尼恩之外，今季表現搶眼嘅貝迪斯中場簡拿利斯，同狀態火熱嘅基達菲謝美馬達都首次入選，加上有「帶刀侍衞」沙治奧拉莫斯領軍，「狂牛」火力有番咁上下。
挪威陣中有般尼茅夫前鋒祖舒亞京治、荷甲維迪斯嘅天才球員馬田奧迪加特壓陣，進攻能力不俗，可惜大部分守將都係喺二、三線聯賽搵食，戰力較弱，面對「狂牛」圍攻難招架；好彩西班牙火力雖強，不過防守力麻麻，近5場4次開4球或以上，挪威就算輸波都應該有機會破蛋，中位數2.5球入球大值博。