今晚東網免費直播德甲雙響炮，重頭戲係《球愛Live Party》同大家一齊睇嘅壓軸戲，3哥RB萊比錫主場迎戰第10位嘅哈化柏林，萊比錫雖然爭標機會渺茫，不過只分別領先第4嘅慕遜加柏同第5嘅法蘭克福2至3分，仍然要搶分力保下屆歐聯參賽資格，今晚前線終於齊人，主場出擊誓破殘陣嘅哈化柏林，ＲＢ萊比錫讓一球照撐上盤。
（on.cc東網周日凌晨1時30分直播）
萊比錫近期狀態穩定，尤其主場出擊，防線演出特別硬淨，今季主場13戰7勝5和僅1負，只失8球係德甲主場失波最少球隊，只係近期鋒線狀態平平，不過經過國際賽休戰後應有所調整，中場大腦科斯貝治終於徹底傷愈，仲喺歐洲國家盃外圍賽為瑞典上陣咗68分鐘，今晚勢可復出擔正，為前線尤素夫保臣同迪姆華拿提供有力輸送，教練蘭歷克亦勉勵近況平平嘅射手迪姆華拿，認為佢嘅質素超凡，只要解決心障必定可以成為德甲最具威脅嘅前鋒，今仗主場出擊誓搶3分。
哈化柏林雖然遇強愈強，但每到季尾例必跌Watt，明顯唔志在歐洲賽，近期兩連敗共失5球之餘，今仗仲要陣容不整，主力中堅佐敦多魯拿加夏同射手伊比斯域齊齊停賽，作客都幾難抵禦萊比錫強攻。