卡尼孫興民傷停熱刺濕滯
歐聯4強首回合開戰，周三凌晨熱刺先於主場鬥阿積士。阿積士今季之所以一路高歌猛進，同超強作客表現有好大關係，加上早前新主場不敗金身已破嘅熱刺，兩位主力前鋒哈利卡尼同孫興民分別因傷停問題缺陣，今仗讓唔起對手，阿積士讓球客勝係不二之選。
（myTV Gold 303、Now 643、有線616及656台周三凌晨3時直播）
作客連劏皇馬祖記
今屆歐聯4強戲碼絕對夠新鮮，相信大部分球迷，季前都估唔到熱刺同阿積士會喺4強碰頭，而其中最令大家驚喜肯定非阿積士莫屬；呢支喺名宿告魯夫帶領下，曾經喺上世紀70年代初稱霸歐洲球壇嘅荷甲傳統勁旅，今季絕對係背負荷蘭足球榮辱出戰歐聯，為咗配合阿積士備戰，荷甲聯賽賽會決定上輪全部賽事延期，畀一班阿積士球員抖到足喺歐聯應戰。
得到荷甲場外發功支持嘅阿積士，今季以中場法蘭基迪莊同後衞馬菲斯迪歷特兩位青訓產品為核心，踢出精彩傳控足球，就算作客都有力主導比賽局勢，今屆歐聯8場作客取得4勝4和，包括早前先後作客擊敗皇家馬德里同祖雲達斯兩支世界頂尖勁旅，今場作客倫敦，有望再次反客為主。
新主場吞首敗洩氣
熱刺能夠殺入歐聯4強，表現及能力同樣值得肯定，不過今場首回合，呢支倫敦球隊有多位主力缺陣，除咗頭號球星哈利卡尼因傷倦勤之外，近期狀態弗爆嘅南韓前鋒孫興民因為累積黃牌關係，今場要坐波監，冇咗兩位神鋒壓陣，熱刺攻力肯定大打折扣，加上中場主力穆沙施素高有傷上陣成疑，陣容天殘地缺嘅熱刺形勢不容樂觀。況且熱刺啱啱吞下喺新主場嘅首場敗仗，士氣大受打擊，今場能否反彈並不樂觀，讓波相當擇使，捧阿積士讓球客勝好過。