周四早上美洲盃B組對決，哥倫比亞將會面對卡塔爾。哥倫比亞年初改由葡萄牙名帥奎羅斯執教，表現大有改善，首戰對阿根廷仲爆冷以2比0贏波，現時哥軍手執3分，呢場贏波就肯定出線嘅情況下，勢必狂攻卡塔爾，中位數2.5球入球大好路。
（Now 650及Now E周四清晨5時30分直播）
哥倫比亞首戰表現最搶鏡係一條攻擊線，除中場占士洛迪古斯助攻助守，效力墨超CF阿美利加嘅射手羅渣馬天尼斯都大放異彩，最重要係有大勇嘅杜雲沙柏達任後備殺手，上場便靠呢位阿特蘭大前鋒建功鎖定勝局。球隊整體火力強勁，難怪哥倫比亞近7場取6勝1負，其中5次開3球或以上，呢場面對賽事初哥卡塔爾肯定咬住唔放狂搶攻。
不過唔好睇小首次參戰美洲盃嘅卡塔爾，球隊首戰落後2球下以2比2逼和巴拉圭，表現令人眼前一亮。其中箭頭人物艾莫爾斯阿里繼亞洲盃決賽上演倒掛金鈎一戰成名之後，嚟到美洲盃一樣冇怯場，上仗為球隊先開紀錄拉開反攻號角嘅正係此子。卡塔爾年初能以7戰全勝姿態勇奪亞洲盃，不容小覷，今戰料同哥倫比亞鬥攻，就算輸波都有望破蛋，中位數2.5球入球大捧得過。