贏波即出線必喪攻
周五凌晨歐國外H組仲有多場重點賽事，其中法國主場鬥摩爾多瓦。小組「2哥」法國呢場贏波就可以攞到決賽周入場券，為免夜長夢多，「高盧雞」肯定一開波就搶攻，魚腩分子摩爾多瓦根本招架唔嚟，一於吼實中位數1.5球半場大。
（有線605台周五凌晨3時45分直播）
暫以19分高踞H組第2嘅法國，呢場贏波即出線，如果失分的話，就要睇同組土耳其對冰島嘅戰果。不過作為堂堂世盃冠軍，球星如雲嘅「高盧雞」，當然唔希望將命運假手於人，呢場雖然冇保羅普巴在陣，不過就有前鋒基利安麥巴比傷愈重披國家隊戰衣，呢位射手踢法夠直接，而且同基沙文喺前場夾到熟，對住魚腩分子摩爾多瓦，求勝心切嘅法國隨時一開波就狂數胡，中位數1.5球半場大值博。
土耳其地獄主場恰冰島
至於同組嘅土耳其今晚喺主場迎戰冰島，土耳其今屆表現極具說服力，目前憑對賽成績壓倒法國排榜首，實力毋庸置疑，呢場只要唔輸波就可出線。而且土耳其有狂熱嘅主場球迷助威，經常可以發揮「地獄主場」威力，今屆歐國外4仗主場全勝，作客即屈嘅冰島想搶分難度唔細，寧願捧主勝好過。
（有線603及604台周五凌晨1時直播）