周四凌晨英格蘭聯賽錦標續演多場激戰，阿King又有過關心水推介。其中北部B組費列活特主場同奧咸上演出線爭奪戰。費列活特主場開局向來慢熱，加上聯賽要全力爭升班，踢英錦標肯定有所保留，對住今場打和都可以出線嘅奧咸，搶攻有難度，半場和咪錯過。（周四凌晨3時45分開賽）
曾效力曼城同紐卡素嘅「英超惡人」祖爾巴頓，掛靴之後執起費列活特教鞭，今季成功帶領球隊喺英甲衝上積分榜前列，大有機會爭奪升班資格，嚟緊主要任務當然係鞏固聯賽升班席位，相反英錦標賽事吸引力較低，難免會被費軍視為「雞肋」。今屆費列活特經常派出副選出戰英錦標，攻力自然受影響，況且對手奧咸今場打和都可以出線，作客情況下肯定踢得更保守。值得留意，費列活特近6次主場出擊，上半場皆未能同對手分出勝負，今場半場和值得追捧。
修安聯出局捧對家
同時間仲有南部F組布里斯托流浪主場鬥史雲頓，晉級無望嘅史軍今屆2戰全敗兼失咗6球，防守差勁，對住贏波就出線嘅流浪，恐難逃一劫，捧讓球主勝。另外南部C組，同樣已篤定出局嘅修安聯主場鬥AFC溫布頓，今場只要贏波即可晉級嘅AFC溫布頓，早前聯賽曾以4比1大挫修安聯，預計照辦煮碗取W冇難度，客勝有計。