聯賽曳仲分心英錦標？
周三凌晨英錦標分組賽連場激戰，等阿King度條過關心水畀大家。其中北部H組林肯城主場鬥洛達咸，林肯城要專注聯賽，根本無暇分心顧及英錦標賽事，況且洛達咸呢場打和就可以出線，作客肯定以守代攻，兩軍戰況料會膠着，呢場入球中位數2.5/3球，入球細值得留意。
（周三凌晨3時45分開賽）
自從曾帶領球隊2度升班嘅功勛主帥丹尼考利季初離隊之後，林肯城一直未能走出低迷狀態，新帥阿普爾頓接掌教鞭至今，各項賽事近9仗只係贏得1場，近7仗總入球全開2球或以下，喺英甲積分榜已經跌落下半版，形勢嚴峻。為全力應付聯賽，林肯城未必會擺太多心機落含金量較低嘅英錦標賽事。況且洛達咸呢場只要打和就可以出線，對住攻力唔算出色嘅林肯城，客場出擊大可睇定嚟踢，入球細好路。
高車士打斯肯索普吼讓主
至於南部A組高車士打主場同葉士域治爆發榜首大戰，葉士域治已經鎖定出線資格，呢場好大機會派副選應戰，高車士打隨時有機可乘，有得受讓當然揀讓球主勝。（周三凌晨3時30分開賽）最後仲有北部A組斯肯索普主場鬥新特蘭，新特蘭近4作客法定時間取1和3負，表現毫無說服力，呢場對住乙組仔斯肯索普都未必贏到波，睇好主隊藉地利頂住對手攻勢，讓球主勝值博。
（周三凌晨3時45分開賽）