征愛爾蘭唔輸就掂
今晚歐國外D組尾輪上演生死大戰，愛爾蘭主場硬感丹麥。目前位列小組第3嘅愛爾蘭，為出線非勝不可，但佢哋向來守強攻弱，惟有先玩拉布博偷雞；榜首嘅丹麥唔輸即出線，正所謂你急我唔急，一定歎慢板睇定先食，兩軍近年碰頭旺開半場和，值得再追。
（有線604及603台周二凌晨3時45分直播）
先講講形勢，愛爾蘭依家12分排第3，落後榜首丹麥及「2哥」瑞士3分及2分，由於瑞士今輪只係鬥弱旅直布羅陀，贏波擸晒3分機會高唱入雲，因此愛爾蘭惟有寄望擊敗丹麥追至同分，由於首循環打和，愛爾蘭可藉較佳對賽成績壓過對手出線，絕對係背水一戰。不過愛爾蘭守強攻弱，今屆歐國外踢咗7輪只入得6球，仲少過第4位嘅格魯吉亞，加上右閘史密斯高文要坐波監，只好先做好防守，睇準機會望偷雞。佢哋連熱身賽在內，近7仗有5次開半場和，初段唔會冒進。
另一邊廂，丹麥上輪憑主將基斯甸艾歷臣省兩粒，6比0大炒直布羅陀升上榜首，並掌握出線主動權，今仗只要唔輸，就令落後3分嘅愛爾蘭無法趕上，鎖定頭兩名嘅出線資格。既然唔一定要贏，丹麥勢必大打穩陣波，睇定先食。查實兩隊都幾有緣，連同上屆世盃附及之前嘅歐國聯在內，近兩年曾5度交手，丹麥獲得1勝4和，勝率唔高，其中4仗開半場和，可見大家初段經常謹慎試探為主，今晚生死關頭更加唔會輕舉妄動，半場和不妨追多鋪。
瑞士目標明確等嗒魚腩
同組另一場賽事，「2哥」瑞士作客包尾大幡直布羅陀。瑞士現時領先愛爾蘭2分，今仗只要贏波就唔使理另一場賽果而直接出線，目標簡單明確；直布羅陀今屆歐國外7戰全敗之餘，更狂失25粒，屬正宗冇骨魚腩，就算瑞士讓到4球都唔使怕辣，直取讓球客勝。