熱刺快車入錯後波
經過上周英足盃回一回氣後，今晚英超重燃戰火，無敵是最寂寞嘅利物浦，將遇到「寸王」摩連奴率領嘅熱刺挑戰。熱刺快車檔期愈開愈打倒褪，入晒後波，面對榜首嘅利物浦肯定有麻煩，紅軍讓半一，樂比綜合咗4大理由撐上盤。
（Now 621周日凌晨1時30分直播）
高普調兵遣將有驚喜
利物浦目前喺聯賽榜遙遙領先13分仲要少踢一場，冠軍已成為囊中物，不過最恐怖嘅係紅軍未有放軟手腳迹象，球員亦似乎有用不完嘅體力，唔覺有咩疲態，呢方面真係要大讚高普嘅調兵遣將能力，喺適當時間畀主將休息，亦肯畀第二梯隊嘅球員機會。好似上周嘅英格蘭足總盃第三圈咁，紅軍即使面對同市宿敵愛華頓，依然派出大量後備上陣，而呢班二線兵亦不負所託，小勝愛華頓嘅正牌軍1比0晉級，可見利物浦無論正選、後備球員都處於極佳狀態，亦係利物浦能夠喺聯賽上半季取得19勝1和佳績嘅原因，睇嚟絕對有機會打破全季100分嘅英超紀錄。
熱刺兩大領袖齊缺陣
反觀熱刺自摩連奴執掌後，成績未見有重大突破，經過3連勝蜜月期，先後不敵曼聯、車路士及修咸頓，聯賽假期快車4戰僅勝1場，本來虛耗已極大，最慘係足總盃對住英冠仔米杜士堡，派出強陣應戰都係僅和1比1需要重賽，令到主力球員冇得爭取時間休息。
熱刺嘅兵力一向係Big 6之中最弱，而且兩名領袖洛里斯及哈利卡尼先後受傷，兩人嘅地位更加係無人可代替，其中後備門將加沙寧加嘅表現可用得人驚嚟形容，一日搵佢做「巴士司機」，等於一架溜後嘅車冇埋「迫力」，呢架大巴都幾難泊得成，至於哈利卡尼最新消息要抖到四月，更難同利物浦周旋。除咗實力同近況，上季兩隊3次交手加埋今季首循環交鋒，利物浦取得全勝，睇怕熱刺今場都難以逆轉。