衝出澳職未威過
今日下晝有亞冠盃H組賽事，由澳職「1哥」FC悉尼主場迎戰韓職班霸全北汽車。雖然FC悉尼於國內聯賽放到甩轆，但出到洲際賽事難登大雅之堂，全北汽車未開咧狀態成疑之餘，仲有兩大中後場主力坐波監，預計兩軍交鋒都唔敢輕舉妄動，捧2.5球嘅入球細最划算。
（Now 670、有線651及611台周三下午4時30分直播）
貴為澳職勁旅，FC悉尼坐擁鮑祖漢、巴巴路西斯及方祖等猛將，目前於國內聯賽高踞榜首，遠遠拋離其他對手。不過悉尼係典型山寨王，每次出戰洲際賽事即現晒形，近6場亞冠盃僅得2和4負，包括今屆首戰慘吞橫濱水手4蛋。睇番悉尼上次於亞冠盃贏波，已經係兩年前嘅事，近兩屆均喺分組賽出局，戰績令人失望，加上日前聯賽打吡戰爆冷輸畀西悉尼流浪者，唔多唔少影響信心，就算今場有主場之利，亦唔敢貿然搶攻。
全北汽車冇態唔齊腳
另一邊廂，全北汽車受到疫情困擾，原定日前開咧嘅聯賽亦宣布延期，對備戰大受影響。呢支韓職班霸雖然係亞冠盃常客，可惜今屆首戰即落筆打三更，不但於主場以1比2輸畀橫濱水手，仲有後衞李鎔及中場孫準浩齊齊做「紅牌阿姑」，今場要停賽，人腳不整兼狀態未足，客場出擊難免會先求穩陣。翻查紀錄，悉尼近6次亞冠盃面對韓職球隊，有5次開2球或以下，今場2.5球嘅細盤有2倍咁好分，值得捧場。