鍾情足總盃唔赦利物浦
英格蘭足總盃16強最矚目大戰，由前屆冠軍車路士主場鬥利物浦。車路士同足總盃特別有緣，近11屆賽事贏過4次冠軍，而且近6次主場出戰英足盃贏5次。「紅軍」啱啱喺聯賽被破不敗身，而且足總盃例出小將，車路士憑主場之利應可搞掂利物浦，車仔讓平半捧上盤。（周三凌晨3時45分開賽）
車路士領隊林柏特喺球員時代曾4奪英足盃冠軍，包括最後一次於2011/12年球季，協助「車仔」以2比1擊敗利物浦奪冠，對於點樣應付呢項世界上歷史最悠久嘅足球比賽，當然有其獨特心得。車路士喺應付英足盃有理想表現，尤其主場出擊更加得心應手，佢哋近6次於史丹福橋球場出擊英足盃獲5勝，而且全部「零封對手」，防線做到滴水不漏，即使今場對手係利物浦，相信一班「藍戰士」都冇有怕。
作客嘅利物浦日前喺英超爆冷輸畀屈福特，聯賽不敗斷纜；眾所周知，佢哋今屆目標係盡快捧起球會史上首個英超冠軍，以及盡力衞冕歐聯，本土盃賽對利物浦來說較為次要，最佳例子「紅軍」喺英聯盃8強，由於撞正要飛去中東踢世冠盃，領隊高普夠膽死派出成隊青年軍鬥維拉。而早前足總盃第3及第4圈，利物浦亦派唔少副選同青年軍落場，相信今場都會見到唔少生口生面嘅「大冧巴」球員上陣。
洛夫雲係防線炸彈
雖然利物浦一班青年軍，包括左右二閘歷高威廉斯同亞當路易斯質素係有，但經驗欠奉，點都要搵個後防支柱傍住，可惜「紅軍」後防將會出洛夫雲孭飛，呢名「大炸彈」正正喺球隊0比3不敵屈福特一役孭晒鑊，今場利物浦個後防真係睇到都驚，車路士唔贏對唔住自己喇！