正所謂「紅」運當頭，德甲同英超均由「紅軍」領導群雄。先講今晚德甲賽事，榜首拜仁慕尼黑作客賀芬咸，德甲球隊於今屆歐洲賽認真威威，唔單止利華古遜同禾夫斯堡殺入歐霸16強，出戰歐聯嘅拜仁、多蒙特及RB萊比錫，亦順利喺16強首回合贏波，其中拜仁更作客大破車路士3比0，盡顯霸氣。
拜仁當弗賀芬咸有難
自從漢斯弗利克中途接手後，拜仁連場報捷，重登榜首之餘，亦搵到最佳陣容，加拿大翼鋒艾方素戴維斯串演左閘，令人眼前一亮。甘美治則愈踢愈成熟，雖然近年多踢右閘，但今季重操故業出任防中，毫無生疏，呢位德國國腳既可死纏爛打，亦具備一定組織力，確有2014年世盃冠軍隊長拿姆影子，有佢同堤亞高艾簡達拿站喺防線之前，有助理順攻守，挾聯賽近9仗8勝之氣勢，要贏賀芬咸冇難度。
至於夜少少開波嘅英超尾場，另一「紅軍」利物浦作客屈福特。屈福特經過早前一段「小陽春」之後，近期表現打回原形，之前5場聯賽未贏過。利物浦喺上周中唔使出戰歐聯，可全力備戰今仗，就算今季聯賽冠軍指日可待，亦有好多紀錄等待佢哋打破，包括能否最快封王，曼市雙雄曾經試過提早5輪捧盃，若果紅軍跟住4輪贏晒，就可以提早7輪奪冠，一定開行turbo，因此今晚兩支德、英「紅軍」取勝在望。