周六晚另一場德甲重頭戲，禾夫斯堡主場迎戰多蒙特。多蒙特上場「魯爾區打吡」大炒史浩克04，聯賽累積5連勝，而且佢哋近9次對禾堡贏8次，往績一面倒，為保強勢迎接下周中鬥拜仁嘅榜首大戰，今場作客唔衰得，熱捧客Ｗ！
（Now 670、有線651及611台周六晚9時30分直播）
多蒙特上場對史浩克雖然收起查頓辛祖，但前線鐵三角交到貨，艾寧夏蘭特及杜根夏薩特各有1入球及1助攻、祖利安白蘭特則交出2個助攻，加上左翼衞拉菲爾古里路梅開二度，最終輕鬆大勝4比0，保持同榜首拜仁4分距離，下周三凌晨佢哋喺主場同拜仁上演冠軍前哨戰，如果今場失分，勢必對士氣造成嚴重打擊，所以鬥志唔使懷疑。
速戰速決半場客勝值兼顧
禾夫斯堡上場憑補時入波作客2比1險勝奧格斯堡，連停擺前聯賽已保持7場不敗，不過除咗0比0打和RB萊比錫外，其餘6場對手全屬中下游球隊。事實上禾夫斯堡雖排第6位，但已落後第5嘅利華古遜11分，實力同前列球隊有明顯分野，而且佢哋對上9次鬥多蒙特只得1和8負，畀對手剋死，閉門作賽冇球迷支持更難爆冷。
多蒙特除咗聯賽5連勝，呢5場上半場都冇失波，有4次半場領先，為留力嚟緊對拜仁嘅大戰，今場自然希望速戰速決，除捧客Ｗ之外，分頭較好嘅半場客勝亦值得兼顧。