今晚德甲尾場壓軸好戲，榜首拜仁慕尼黑主場迎戰法蘭克福。拜仁近12場聯賽豪取11勝1和，相反法蘭克福聯賽4連敗，狀態差天共地；拜仁首循環作客法蘭克福曾經大敗1比5，為報一箭之仇，今場唔會腳軟；兩軍近6次交鋒共炮製29個士哥，5次開4球或以上，捧3.5球入球大啱數。
（Now 670、有線611及651台周日凌晨零時30分直播）
法蘭克福首循環曾經喺主場大炒拜仁5比1，不過當時拜仁正值低潮期，嗰場輸波之後，拜仁正式炒咗尼高高華，改由漢斯弗利克領軍，後者亦用行動證明球會冇揀錯人，連同上場重開後首戰2比0作客擊敗柏林聯，拜仁近12場聯賽獲11勝1和。波蘭神鋒羅拔利雲杜夫斯基今季聯賽勁轟26球，場均1場入1球，湯馬士梅拿、基拿比等攻擊好手經過停擺後，狀態亦冇走樣，為報上次大敗之辱，主場必定數番夠本。
近年對賽多入球騷
法蘭克福上輪主場1比3不敵慕遜加柏，連同停擺前輸畀多蒙特、利華古遜兩支前列分子，狀態、信心明顯走下坡，同季初贏過利華、拜仁及打和多蒙特嗰支法蘭克福完全兩回事。兩軍近年交手可以講係入波保證，近6次對賽有5次總入球開4球或以上，3.5球入球大抵玩。