皇馬貝迪斯專開大騷

西甲重頭戲，貝迪斯主場迎戰皇家馬德里。皇馬上周首度亮相，即使全場佔盡優勢，亦只能與皇家蘇斯達悶和0比0，經過一場調整，相信「銀河艦隊」今仗會積極搶攻避免再失分，皇馬近6次作客貝迪斯5次開3球或以上，中位數2.5球入球大值得再追。（Now 632周日凌晨3時直播）

近4季西甲首仗均旗開得勝嘅皇馬，上仗西甲首戰竟然和波失分，「銀河艦隊」對上一次開季未能取勝，要數到2015至16年球季，當時首仗作客希杭，同樣打成0比0，結果嗰季由巴塞隆拿奪冠，皇馬僅輸1分得亞軍，為免歷史重演，皇馬將帥今仗定必打醒十二分精神，務求全取3分。

貝迪斯主場遇強喜對攻
首仗所見，皇馬表現其實唔太差，且交出不俗數據，控球率68%，射門多達16次，賓施馬及洛迪高高斯等鋒將狀態亦唔錯，未能取得入球實屬欠運，只要皇馬今場發揮應有水準，唔難喺貝迪斯身上取得入球。

貝迪斯開季2戰全取6分，基斯甸泰路、費基亞及威廉卡維奴先後開齋，明顯已經上力，相信入球陸續有嚟。尤其貝迪斯主場遇強愛鬥攻，近6次聯賽主場對皇馬5次開3球或以上，今仗隨時再演入球騷。