英超聖誕快車演「雙城記」，「2哥」曼城作客「狐狸」李斯特城。今場係兩軍本月內第2次碰頭，曼城一向火力強勁，啱啱爆冷輸波，梗係急於贏波追趕榜首利物浦，但「狐狸」有Big 6殺手占美華迪助陣，隨時合演入球騷，捧中位數2.5球嘅大盤。
（Now 622周三晚11時直播）
曼城主帥哥迪奧拿崇尚進攻，快翼利萊辛尼近期表現突出，近5次上陣入3球兼有2次助攻，至於以往頻頻甩轆嘅史達寧，今季聯賽亦已攻入9球，加上巴西前鋒加比爾捷西斯早前打破聯賽入球荒，以其質素，相信入球陸續有來。同時，啱啱好番嘅中場猛將奇雲迪布尼，已經連續2場有波入，包括上周中英聯盃淘汰李斯特城之役，火力強勁。況且「藍月亮」上場主場以2比3爆冷輸畀水晶宮，被榜首利物浦甩開4分，為追趕紅軍必定搶攻。
李城華Dee強隊殺手
李斯特城之前戰績麻麻，搞到領隊佩爾帥位危危乎，但上仗回勇作客贏車仔，打破對方今季聯賽主場不敗身，而入波嘅「華Dee」占美華迪，不嬲對親強隊零舍醒神，翻查紀錄，佢對Big 6球隊已累積25粒，單係對曼城就有4球進帳，果然係Big 6殺手，「華Dee」最叻打反擊，撞正例必谷前嘅曼城實搵到食。曼城過去4季聖誕快車16場，共有11場開3球或以上，單計近8仗聯賽，佢哋都有7次至少開3粒，捧大盤更上算。