英超聖誕快車尾場，屈福特主場硬撼車路士。車仔上輪爆冷不敵李斯特城，表現令球迷大跌眼鏡，呢場為重回正軌肯定會主動搶攻，加上屈福特本身火力都有番咁上下，兩隊隨時合演入球騷，中位數2.5球入球大值博。
（Now 621周四凌晨3時30分直播）
今季執起車仔教鞭嘅意大利教頭沙利，對球隊踢法進行大規模改革，希望令車仔踢出賞心悅目嘅傳控足球，不過任何改變都唔係一朝一夕可以達成，季前接手嘅沙利自己都戴定頭盔：「改革車路士初期，球隊成績難免會受影響。」
查實季初車仔成績絕對唔失禮，仲一度取得連勝戰績，不過想即刻重回爭標行列當然不切實際，所以上仗面對中游分子李斯特城失分亦都好正常。而且沙利嘅加盟，令唔少球員受惠，其中夏薩特就係最佳例子，呢位球隊王牌至今已經斬獲8球，成功轉型作高效射手，搭住重獲新生嘅英格蘭本地薑巴克里，車仔攻力有保證。
「大黃蜂」迪路菲奧當弗
「大黃蜂」屈福特近期回勇，取得聯賽兩連勝，包括上仗擊敗近期走勢強勁嘅韋斯咸，其中西班牙快翼迪路菲奧近兩仗都有波入，腳風幾順，幫助球隊近4仗聯賽3次開3球或以上。加上兩隊近年相遇都唔會留手，近6次聯賽交手5次開3球或以上，呢場兩隊鬥攻格，入波肯定唔少，中位數2.5球入球大冇走雞。