今晚拆禮物日英超好波連場，筆者一向是其是、非其非，唔用「贏面較高」呢類模稜兩可嘅字眼，由於前6強隊今晚嘅對手實力偏弱，所以贏波機會高唱入雲。
曼聯阿仙奴都有起色
如果有留意英超嘅球迷，不難發現近年全是「藍色的天空」，從2014年起，最終成為冠軍嘅曼城（2次）、車路士（2次）及李斯特城，全部都係着藍衫，傳統嘅紅色勢力曼聯、阿仙奴及利物浦相形見絀。當然相比之下，利物浦喺高普領導下已逐漸走出谷底，上屆殺入歐聯決賽，今季喺聯賽又領導群雄，仲係唯一不敗之師，自從1992年英超後，紅軍從未染指過冠軍，佢哋恨捧盃恨到發燒，難怪今季咁搶韁。
曼聯本身實力冇問題，但前主帥摩連奴神憎鬼厭，搞到內部士氣低落，變成無兵司令，冇人為佢賣命，落得被炒收場，如今蘇斯克查接手，上仗即大炒卡迪夫城5比1，1場勝仗唔代表「蘇B」有幾叻，但肯定佢能夠令眾將團結一致，此乃反彈先兆。至於阿仙奴算係成功過渡後雲格時期，西班牙籍教頭艾美利擅於調整及作出針對性部署，與雲格過於自由發揮比較，球員獲得更清晰指令，表現自然較好。來到拆禮物日，隨時係英超「三紅」反彈嘅開始。