周三下午澳職獨腳戲，阿德萊德聯主場迎戰西悉尼流浪者。開季表現唔錯嘅阿聯，近期頻頻失分，仲有跌出前6嘅危機，好在呢場只係對住狀態飄忽嘅下游分子流浪者，靠主場之利阿聯肯定希望先發制人，全力爭取反彈，半場主勝值博。
（Now 639、有線615及655台周三下午4時50分直播）
近5主場對賽半場全領先
阿德萊德聯今季開局表現搶眼，仲率先喺澳足盃決賽擊敗FC悉尼，捧得賽季首個獎盃，聯賽仲曾經佔據前列位置，可惜近期狀態略為下滑，先後輸畀兩支墨爾本球隊，積分榜排名仲因此跌落前6邊緣。隊長伊沙亞斯就出面激勵球隊士氣，賽前直言要重拾主場優勢：「主場賽事尤其重要，我哋要由開波第一分鐘開始就採取主動。」
阿聯想反彈，呢場面對西悉尼流浪者絕對係好機會，皆因阿聯近4次面對流浪者取3勝，而近5次主場迎戰流浪者，阿聯半場都可以取得領先優勢，明顯食住對手。況且流浪者主力門將贊積杜域呢場要停賽，後防隱患大增，未必抵擋得住阿聯攻勢，阿德萊德聯半場勝好分頭。