87億新主場今晚首騷
熱刺球迷等到頸都長，可容納超過62,000人、耗資8億5,000萬鎊（約87億港元）嘅新主場正式啟用，首場英超會係今晚鬥水晶宮嘅倫敦打吡。熱刺近5場聯賽1和4負，保「前4」形勢急轉直下，球隊為咗起新球場搞到冇錢買人，如果冇埋下屆歐聯參賽資格，絕對稱得上災難，信熱刺反彈贏波為新球場揭幕贈興，讓一球照捧上盤！
（Now 622周四凌晨2時45分直播）
熱刺新球場早喺2015年開始動工，連同周邊發展及建設，整個工程花費達87億港元，為減省開支，熱刺成為英超史上首支全季冇買新球員嘅球隊，喺多條戰線摧殘下，一眾主力搏到季尾終於疲態畢露，近6場比賽除歐聯擊敗多蒙特，其餘5仗聯賽只得1分，爭入前4變得告急。熱刺上場對利物浦表現其實唔差，如果唔係穆沙施素高及迪利阿里比賽尾段先後失機，有權搶分落袋。睇番佢哋對上5場聯賽有4場作客，當中包括鬥車路士、利物浦兩支Big 6，輸波屬非戰之罪，為求反彈今場肯定搏甩髀。
近7次聯賽碰頭 水晶宮全敗
熱刺上季開始借用溫布萊球場踢聯賽，經過一個半球季「流離失所」，今晚終於「回歸」主場出戰。新球場可容納62,000名觀眾，僅次於曼聯奧脫福，普捷天奴就話球隊能夠喺主場球迷打氣下踢出最佳水準。水晶宮上場護級大戰擊敗哈特斯菲爾德，直接送對手降班，自己亦以36分升上聯賽榜13位，領先「尾3」卡迪夫城8分，壓力大減，加上近7次聯賽對熱刺輸晒，熱刺上盤捧得過。