施丹上艦瘋狂試陣
今晚西甲快車壓軸尾場，「3哥」皇家馬德里作客硬撼華倫西亞。「銀河艦隊」自施丹回巢救亡後，權力更大即瘋狂試陣，表現就唔多穩陣，今輪造訪連續16場未輸過「蝙蝠兵團」，冇乜本錢讓波，寧捧華倫讓球主勝。
(Now 632周四凌晨3時30分直播)
皇馬自從歐聯16強出局、4連冠夢碎後，中途接手嘅蘇拿利落鑊，施丹以救世主身份強勢回歸，會長皮里茲叫得佢返來梗係畀佢打晒骰，相信呢位名帥會有更大話事權。由於皇馬今季冇嘢好爭，施丹趁機瘋狂試陣，回巢後短短教咗2場，就用咗19名球員，包括重新起用愛將艾斯高及基羅拿華斯，上仗因基羅拿華斯啱啱打完國際賽，索性搵囝囝盧卡施丹把關，最終險勝弱旅侯爾斯卡3比2，連埋首仗贏切爾達2比0，試陣味濃表現不穩。
蝙蝠兵團近16戰未輸過
季初出閘脫腳嘅華倫西亞，踏入季中演出愈來愈穩定，尤其係中場悍將干度比亞及快翼干卡路古亞迪斯傷愈復出，攻防質素立即升呢，聯賽連盃賽在內，自1月尾起華倫共出戰16仗，取得9勝6和未輸過佳績，包括進身歐霸盃8強及西盃決賽，信心爆棚。加上皇馬近4次作客華倫只曾1勝，難贏硬淨到暈嘅「蝙蝠兵團」，讓球主勝不容錯過。