近日陷入賭波醜聞的曼聯七小福成員史高斯，眼看母會再陷泥潭，再次在電視機旁邊一邊剝花生，一邊大放厥詞。史高斯批評兩位師兄安東尼馬迪爾及拉舒福特，直斥兩人無資格為紅魔鬼效力。
早於季初的時候，史高斯已是批評得曼聯最恨的舊將，當時更與前隊友約基一同收到領導層的電郵，要求他們別再指指點點。不過史高斯目前在紅魔鬼並無官職在身，一於你有你禁發聲，佢老哥則繼續暢所欲言。
雖然白頭沈認為，史高斯咁熱衷於批評，有理由相信佢恨做曼聯領隊恨到發燒。不過亦不能否認他對曼聯有愛之深，責之切的情懷。今次佢又冇鬧錯，基本上安東尼馬迪爾及拉舒福特的確鮮有踢好波。
史高斯表示，大家別再談論兩人的潛力了，因為刻下的危急存亡關頭，曼聯已沒有時間發掘他們的實力。其實除了安東尼馬迪爾及拉舒福特外，另外兩位天價前鋒阿歷斯山齊士與盧卡古也是碌碌無為。另一名宿加利尼維爾更形容，盧卡古在場上只要沖刺三次，便好似用晒所有體力一樣。
目前曼聯的陣容千瘡百孔，恐怕要由頭執到落腳，先有機會於短期內重返列強水平。不過如他們無緣來季歐冠，屆時買人必定會有相當難度。最心痛的，一定是費Sir矣！