英超終局之戰，頹勢未止的曼聯可謂衰到貼地，於奧脫福淨吞已降班的卡迪夫城雙蛋，以一波2和4負的劣績告別球季，難怪在夢劇院球場有魔迷大叫蘇斯克查下台。
白頭沈多次指出，蘇斯克查只不過是紅魔鬼云云亂象的另一隻代罪羔羊而已！之前尹高爾如是、摩連奴如是，如今蘇斯克查也如是。
兩個月前，蘇斯克查帶領10連勝，魔迷無不大喊深慶得人，如今戰績打回原形，又拿領隊來出氣了，也可以預期蘇斯克查唔會做得耐，英格蘭名宿麥臣更預言，紅魔鬼或會在暑假索性請蘇斯克查食無情雞。
對於搵邊個接手爛攤子，曼聯更需要立即解決主力離隊問題，保羅普巴、迪基亞均已萌離心，勉強再留用兩人，之後球員霸權又必定再重現更衣室，白頭沈認為倒不如引刀成一快，送兩位麻煩友上路。
另外，智利球星阿歷斯山齊士加盟後如災難一樣的表現，已經令領導層受夠，據聞他們希望以阿歷斯山齊士，去換取祖雲達斯鋒將保羅戴巴拿。吓，白頭沈冇睇錯吖嘛，用山齊士換戴巴拿？咁同用10蚊就想換人100蚊有乜分別？曼聯幕後離地成咁，唔怪之得呢幾季咁失敗啦，我認為他們起碼仲有幾季衰。